Няръяна Ӈэрм
Илам’ савумдава’ вато
Ӈарка Россия яна’’ ӈэвахы’’ ӈудондана’’ Ӈэрм тер’’ нерняӈы илам’ савумдава’ няю’ ненадо падарм’ падвы’’. Ныхыда 2036 по’ ёльцянд’ таняӈгу.
Время для чтения ~ 2 минуты
2026 похона лимбя’ иры’ нюртей яляхад ненадо падаркана ӈэда’’ серо илаӈганана’’ мэць пяӈгуна’’. Я’ мидыхыд харто’ яха’’нато’ илена’’ Ӈэрм’ тер’’ ед’ сертавы Концепциям’ нёдаӈгува’’.
Сямянхат таранаӈэ толёда’’ сер’’ тарця’’ — экономической, социальной серо нерня’ тидхалембава, иле мэта’’ ё тарулава, невхы ила’ саирм’ мэ’’ма, ты пэрма, ёрма, ханева.
Илесь, мюсерць ё лэтрава’ серкана неноховавна я’ сяр’ нийм’ хабтомдамбавам’ ненадумдавы’’. Ӈадьбята ты’’ хадо, яха’’, то’’ ид вомдавабавам’ тасламбади’’ поӈгана ӈэрм’ тер’’ ненэцие мэванзь табедамби’’.
Сававна, таӈга илева’ е’’эмня сертаванда’’ манзаяӈэ падвыдо’ тарця’’:
— ханярина юне намдорць мэта интернетм’, связьм’ савумдамбава,
— тодо’’ яха’’на МФЦ ӈокамдамбава,
— лекар’’ мядо мимбава,
‒ ненэцие сенз ӈэвам’ манэ’’сарма,
— мутры няд’’мяць лекараха’’ лаханава, нюдя хардаха’’ лекар’’ тэворма.
Тохолкова’ нямна сертаванда’’ манзая’’:
— ӈэрм’ тер’’ вадавна ӈэда’’ толаӈгобць’ падыбава, школаха’’ ӈэдабтамбава,
— едэй мутры няд’’мяць ӈэрм’ тер’’ вади лэтрамбава.
Ӈэрм тер’’ ила’ саирм’ лэтрава’ няю’ сертаванда’’ манзая’’:
— хэбидя я, ила саирм’, невхы сё, лаханако лэтрава, теневава, мэ’’ма,
— ӈэрм’ тер’’ вадавна лаханана’’, паднана’’, хынота’’, лаханако мэта’’ ненэцие тю’’у’ тидхалембава, ӈэрм’ тер’’ вади, ила’ саирм’ тохоламбада’ учёной нядабава.
Мат’’ иры’ ямбан’ ФАДН’ серо тидхалембада’’ 2036 по’ ёльцянд’ Ӈэрм’ тер’’ илесь яха’’на минреванда’’ манзаидо’ таслаӈгудо’, падарт’падаӈгудо’.
Автор: Галина Окотэтто’ падвы
Авторы
Няръяна Нгэрм
Темы